ޑިޕްރެޝަނަކީ ދުނިޔޭގެ އެތައް ބަޔަކަށް ކުރިމަތިވެދާނެ ބައްޔެކެވެ. މިކަމަށް މަގުފަހިވަނީ މީހުން މާ ބޮޑަށް ވިސްނީމައެވެ. ދުނިޔޭގެ އެތައް ބައެއް ޑިޕްރެޝަނަށް ދެއެވެ. އެހެންކަމުން ޑިޕްރެޝަނުން ސަލާމަތްވާނެ ގޮތުގެ އިރުޝާދު މި ލިޔުމުގައި ހިއްސާކޮށްލާނަމެވެ.
ޑިޕްރެޝަނުން ސަލާމަތްވުމަށްޓަކައި ކުރެވިދާނެ ވަރަށް މުހިންމު އެއްކަމަކީ މީހުންގެ އެހީ ހޯދުމެވެ. އެގޮތުން ކޮންމެ ދުވަހަކު މައިންބަފައިންނާ ވާހަކަދައްކާށެވެ. އަދި ރައްޓެހިންނާއި އެކީ ހިންގާލަން ދާށެވެ. މީގެ އިތުރަށް ތެރަޕިސްޓުން ކައިރިން ފަރުވާ ހޯދާށެވެ. ގޭތެރޭގެ މަސައްކަތު މާޙައުލުގައި ޝާމިލްވެ އުޅޭށެވެ. އޭގެ އިތުރަށް ޓީޗަރުންނާއި އެއްކޮށް ވާހަކަދައްކާ މަޖާކޮށްހަދާލާށެވެ. މިގޮތަށް އަޅުގަނޑުމެންގެ ޢަމަލްތައް ބައްޓަންކޮށްފިނަމަ ޑިޕްރެޝަނުން ސަލާމަތްވުމަށް އެހީތެރިކަން ލިބޭނެއެވެ.
ޑިޕްރެޝަނުން ސަލާމަތްވުމަށް ކުރެވިދާނެ އަނެއް ކަމަކީ ދިރިއުޅުމުގެ އާދަކާދަތަކަށް ބަދަލުގެނައުމެވެ. އެގޮތުން ކޮންމެ ދުވަހަކު ވަގުތުން ވަގުތަށް ފަރުޞު ފަސް ނަމާދު އަދާކުރާށެވެ. އަދި ކޮންމެ ދުވަހަކު ހެނދުނު ކަސްރަތުކުރާށެވެ. އަދި ހަމައެހެންމެ ކޮންމެ ދުވަހަކު ޤުރުއާނުން 10 ވަރަކަށް ޞަފްޙާ ކިޔެވުމާއެއްކޮށް 8 ގަޑިއިރުގެ ނިދި ހަމަކުރާށެވެ. މިގޮތައް ކަންތައްކޮށްފިނަމަ ޑިޕްރެޝަނުން އަރައިގަތުމަށް މަގުފަހިވާނެއެވެ.
ޑިޕްރެޝަނުން އަރައިގަތުމަށް ވަރަށް ގިނަގުނަ ކަންކަން ކުރެވޭނެއެވެ. އެންމެ މުހިންމު އެއްކަމަކަށް ދިމާވާ ކަންކަމުގައި އެހެން މީހުންގެ އެހީ ހޯދާށެވެ. އޭގެ އިތުރުން ދިރިއުޅުމުގެ ވައްޓަފާޅިއަށް ބަދަލުގެންނަން މަސައްކަތްކުރާށެވެ. އޭރުން ޑިޕްރެޝަނުން ސަލާމަތްވުމަށް މަގުފަހިވާނެއެވެ.
